Inuit innarluutillit pisinnaatitaaffii pillugit Naalagaaffiit Peqatigiit isumaqatigiissutaat

Danmarkimi isumaqatigiissut atuutilernerani Kalaallit Nunaanni atuutilertoq.

Isumaqatigiissutip matuma siunertaraa inuit innarluutillit tamarmik inuit allat assigalugit inuit
pisinnaatitaaffiinik tunngaviusumillu kiffaanngissuseqarnissamut pisinnaatitaaffinnik tamanik
atuisinnaanerisa siuarsarneqarlutillu illersorneqarnissaat periarfissaasalu
qulakkeerneqarnissaat aammalu soorunami ataqqinassuseqarnerisa siuarsarneqarnissaa.
Inunnut innarluutilinnut ilaapput inuit, timikkut, tarnikkut, silassorissutsimikkut imaluunniit
misigissutsimikkut piginnaanikillisimasut, piginnaasanik mattussisut allat sunneeqataanerisigut
inuit allat assigalugit inuiaqatigiinni tamakkiisumik peqataasinnaanerannik akornusiisinnaasut.

Nassuiaatit

Isumaqatigiissummi matumani:

ilaapput ”atassuteqaqatigiinneq” oqaatsit, allagartaliussanik takutitsineq, sattattarissanik
allattaseq, atuinermut malugissutsit atorlugit attaveqaqatigiinneq, angisuunik allattaaseq,
tusagassiuteqarfiit annertuut aammalu allattaaseq, nipi, ersarissumik oqalunneq,
atassuteqaqariaatsit, atassuteqaatitigut atortut, - periutsit, aammalu nalunaaruteqartarnermutaamma
attaveqaqatigiinnermut teknikkikkut atortut tamanit atorneqarsinnaasut atorlugit
attaveqaqatigiinnermut

ilaapput ”oqaatsit”, oqalunnermi oqaatsit, ussersorluni oqaatsit aammalu oqaatsit
oqaasertalersugaanngitsut allat,

”innarluuteqarneq pillugu assigiinngisitsineq” isumaqarpoq innarluuteqarneq pissutigalugu
immikkoortitsinerit imaluunniit peqataaqqusinnginnerit tamarmik, tamatumani politikkikkut,
aningaasaqarnikkut, kulturikkut, inuinnartut imaluunniit susassaqarfinni suugaluartuni tamani,
inuttut pisinnaatitaaffinnik kiffaanngissuseqarnermullu tunngaviusunik inuit allat assigalugit
inuttut atuisinnaanermut iluaquteqarsinnaanermullu pisinnaatitaaffinnik tamanik
mattussinissamut atorunnaarsitsinissamulluunniit sunniuteqarnissaq siunertarineqarpat.
Tamatumunnga ilaapput assigiinngisitseriaatsit tamarmik, naammaginartumik
naleqqussaanissamut itigartitsineq ilanngullugu,

”naammaginartumik naleqqussaaneq” isumaqarpoq pisariaqartinneqartunik naleqquttumillu
allannguinermik naleqquttunngorsaanermillu, tamanna nassataqassanngikkaanngat
naleqqutinngitsumik pisariaqanngitsumilluunniit suliassersuinermik, tamannalu pisuni
ataasiakkaani pisariaqarluinnaraangat qulakkeerniarlugu inuit innarluutillit inuit
pisinnaatitaaffiinik aamma kiffaanngissuseqarnermi tunngaviusumik pisinnaatitaaffinnik inuit
allat assigalugit atuisinnaanerat iluaquteqarnissaallu,

”tamanut atuuttumik ilusilersuineq” isumaqarpoq, tunisassianik, avatangiisinik,
aaqqissuussinernik aamma neqeroorutinik ilusilersuineq, tamatumani anguniagaalluni taakkua
sapinngisamik inunnik tamanik naleqqussaanermik imaluunniit immikkut ittumik
ilusilersuinissamik pisariaqartitsinngitsumik atorneqarsinnaanissaat. ”Tamanut atuuttumik
ilusilersuinerup” ajornalersinngilaa inuit innarluutillit tamatumunnga immikkut pisariaqartitsisut
atortutigut ikiorneqarnissaat, tamanna pisariaqartinneqaraangat.