”Illit inuunerit – illit pisinnaatitaaffitit”
Videoliani peqataasut pingasut: Hans-Henrik Suersaq Poulsen, Ebba Pîvât Filemonsen aamma Lili Frederiksen Chemnitz.
IPS-miit inuit ataasiakkaat oqaluttuaannik imalinnik paasisitsiniaanermi videolianik saqqummiivugut.
Inuit Pisinnaatitaaffii pillugit Siunnersuisoqatigiinniit (IPS) maanna qulequtaq ”Illit inuunerit – illit pisinnaatitaaffitit” aallaavigalugu paasistisiniaanermi videoliat nutaat saqqummersinneqarput. Videoliatigut saqqummersitsinermi inuit pisinnaatitaaffii attuumassuteqartut aallaavigineqarput, IPS-illu inuit attaveqaqatigiittarfiisigut, Facebook aamma Instagram, aqqutigalugit saqqummersinneqassallutik.
- Videoliatigut inuit oqaluttuaat inuunerminnillu oqaluttuassaat aqqutigalugit innuttaasut inuit pisinnaatitaaffiinut tunngasutigut ilisimaqarnerulernissaat siunertarineqartoq siunnersuisoqatigiinni AC-fuldmægtigi Natuk Rosing Fleischer oqarpoq.
Inuit pisinnaatitaaffii pillugit ilisimasat 24-niit 29-inut ukiulinni appasinnerpaapput. Kalaallit inuiaat inuit pisinnaatitaaffiinut tusagassiutinillu atueriaasiinut tunngatillugu siunnersuisoqatigiit 2021-mi misissuisimanerat naapertorlugu taamaallaat taakkunani 26%-it ilisimasaqalaarlutilluunniit ilisimasaqarluartuupput. Taamaattumik inuit attaveqaqatigiittarfiisigut saqqummiinerit inuusuttut angunissaannut aqqutissaalluarput, pingaartumik nunatta attaveqaasersugaanera ilusaalu eqqarsaatigissagaanni.
- Inuit pisinnaatitaaffii pillugit ilisimatitsinerni nunatsinni illoqarfinni nunaqarfinnilu annerni minnernilu innuttaasut tamarmik ilisimasaqalernerunissaat anguniarneqarpoq. Suliatsinni nunatsinni innuttaasut tamakkerlutik pisinnaatitaaffinnut eqqummaarinninnerulernissaat atuinissaallu tunaartarivarput, Natuk nangillluini oqarpoq.
Videoliani ilaatigut inuit assigiinngisitsinernik, isumapiloqarneq tunngavigalugu tatiginnilersitsiniaanernik (grooming) angerlarsimaffeqanngitsuunernillu oqaluttuartut takusinnaavasi. Tamakkua saniatigut avatangiisit pillugit aammalu meeqqat inuusuttullu atugarissaarnissaannik kiisalu kulturitta illersorneqarnissaannik sulissuteqartut, suliniutillu tamakkua aqqutigalugit inuit pisinnaatitaaffiisa qanoq siuarsarneqarnissaannut tunngasut takusinnaavasi.
Paasisitsiniaaneq manna Nordatlantpuljemit aningaasalerneqarsimavoq, Danmarkimilu Inuit Pisinnaatitaaffiinut Institutti suleqatigalugu suliarineqarsimalluni. Paasisitsiniaanermi videoliat aqqanillit Nuummi, Sisimiuni aamma Sarfannguani immiunneqarsimasut takusinnaavasi.
- Neriuppugut suliniut manna ingerlateqqissinnaallutigu, taamaalillutalu inunnuttaasut illoqarfinni nunaqarfinnilu allaniittut amerlanerusut ilaatissinnaallutigit. Tassanili aningaasaliinerit apeqqutaassapput, allattoqarfimmi pisortaq Tina Dam oqarpoq.
Kontakt
