Oqaloqatigiinnissamut apeqqutissiat nunarput tamakkerlugu angallanneqassapput
Twice Colonized aamma IPS: Inuit pisinnaatitaffiinik sorsuutiginnittoq Aaju Peter peqatigalugu,”Pisinnaatitaaffitit ilisimalikkit” qulequtsiullugu Ilulissanut Sisimiunullu angalassaagut.
Sap. ak. tulliani Inuit Pisinnaatitaaffii pillugit Siunnersuisoqatigiit (Siunnersuisoqatigiit) Inuttullu Pisinnaatitaffinnut Institutti (Institutti) inuit pisinnaatitaffiinik sorsuutiginnittoq Aaju Peter peqatigalugu,”Pisinnaatitaaffitit ilisimalikkit” qulequtsiullugu Ilulissanut Sisimiunullu angalassapput. Tamatuma peqatigisaanik, piviusumik tunngaveqarluni filmiliaq Twice Colonized, Aaju Piitap pingaarnertut inuttaaffigisaa najoqqutassiorfigisaalu, takutinneqassaaq.
2022-imi qulequtaq taanna qulequtaralugu, Sisimiuni GUX-imi ilinniartut ”apeqqutit oqaluuserisassat” qulequtsiullugu misiligutaasumik suleqatigiissuteqarnermi (workshop) sammisaqartinneqarneranni, Siunnersuisoqatigiit aamma Sisimiuniipput. Ilinniartut isummersuutaat misilittagaallu pingaarutillit atorlugit, Siunnersuisoqatigiit inuit pisinnaatitaaffii pillugit apeqqutit oqaluuserisassat inerisaqqippaat, taakkorpiaappullu angalanissani tunngaviusut.
”Inuit pisinnaatitaaffiinik oqaluuserinninnisamut, apeqqutinik oqaluuserisassanik suleqatigiissuteqarnerni peqataasut akornanni ilisimasat, soqutiginninnerup piginnaasallu malunnaatilimmik annertusinerat, naliliinitta takutippaa. Innuttaasummi inuit pisinnaatitaaffiinik soqutiginartumik naapertuuttumillu oqaluuserinnissinnaanissamut piginnaanngorsarnissaat, suliniummi siunertaavoq. Taamaammat suleqatigiissuteqartitsinitta (wokshop) Kalaallit Nunaanni innuttaasunut amerlanernut siammarternissaannut maanna piareernerput nuannaarutigeqaarput", suliniummik aqutsisoq Kristina Kristensen oqarpoq.
Sap. ak. tulliani suleqatigiissuteqarnissat Ilulissani Perorsaanermik Ilinniarfimmi Sisimiunilu GUX-imi ingerlanneqassapput.
Suliniut Atlantikup Avannaamiuinut Aningaasaliissutinit aningaasaliiffigisanut – danskit aningaasaqarnermut inatsisaanni immikkut aningaasaliissutinut- ilaavoq. Tamatumunnga atatillugu Siunnersuisoqatigiit, Danmarkimi Inuttut Pisinnaatitaaffinnut Institutti peqatigalugu, 2024-ip naanissaanut, kalaallit innuttaasut akornanni inuit pisinnaatitaaffii pillugit ilisimasanik nukittorsaanissamut iliuusissanik assigiinngitsunik inerisaanissamik suliniuteqarput.
”Innuttaasut akornanni nuit pisinnaatitaaffiinik annertunerusumik ilisimasaqalernissaq, Siunnersuisoqatigiinni anguniakkat ilagaat. Taamaammat Atlantikup Avannaamiuinut Aningaasaliissutit, matumanisut inuit pisinnaatitaaffiinik, taakkulu naapertuunnerannik ilisimasanik, Kalaallit Nunanani innuttaasunut siammarteraluni suliniuteqarsinnaanermik periarfissiinerat, nuannaarutigaarput. Siunnersuisoqatigiit suliniutinik taamaattunik inerisaanissamut akissaqanngillat. Taamaammat anguniakkatta anguniarnerannut avataaniit aningaasaliissutit Atlantikup Avannaamiuinut Aningaasaliissutitut ittut pisariaqartippagut”, allatseqarfimmi pisortaq Tina Dam oqarpoq.
Immikkut pisussaq
Aaju Peter aamma angalaqataassaaq. Taanna arnaavoq inatsisileritooq, inuit pisinnaatitaaffiinik sorsuutiginnittoq filmimilu ”Twice Colonized” pingaarnertut inuttaasoq. Filmimi Aajup inuttut oqaluttuassartaa inuuninilu tamaat issittumi Inuit pisinnaatitaafiisa nukittorsarneqarnissaannik sorsuutiginninnera takutinneqarpoq. Filmi Kalaallit Nunaanni takuteqaarneqarpoq Nuuk International Film Festivalimi septembarip ulluisa 13-ianni kingornalu Nuummi, Sisimiuni Ilulissanilu takutinneqassalluni.
Immikkorluinnaq ittumik, suleqatigiissuteqarnernut atatillugu filmip ”Twice Colonized” takutissinnaanera peqataasunullu Aajumut apeqquteqarsinnaallunilu akissuteqarfigineqarnissamut neqeroorsinnaaneq, Siunnersuisoqatigiit Instituttillu tulluusimaarutigaat. Suleqatigiissutigisat ’Twice Colonized’ -ilu aallaavigalugit, nunap inoqqaavisa pisinnaatitaaffii, immikkoortitsisarneq Kalaallit Nunaatalu Danmarlillu akornanni pissutsit pillugit oqaloqatigiinnermik pingaarutilimmik ammaanissaq kissaatigaarput.
Tamatuma saniatigut Siunnersuisoqatigiit Instituttillu filmi Ilulissani Sisimiunilu tamanut takutinniarpaat, tassanilu aamma filmeriat Aaju Peter-mik naapitsinissaminnut apeqquteqarnissaanullu periarfissinneqassapput.
Sap. ak. tulliani angalanissaq Kalaallit Nunaat tamakkerlugu angalanissamut aallarniutaavoq. Oktobarimi Siunnersuisoqatigiit Instituttilu- ilaatigut Aasianni suleqatigiissuteqartitsissapput (workshop), taamatuttaaq Kujataa Tunulu 2024-imi upernaakkut tikinniakkat ilagalugit.
Filmi ”Twice Colonized” tamanut takutinneqassaaq Ilulissani septembarip ulluisa 17-ianni 18-iannilu Sisimiunilu septemberip ulluisa 19-ianni 20-iannilu. Nuummi filmi Katuami takutinneqassaaq septembarip ulluisa 19-ianniit 26-iannut.