Inuit Pisinnaatitaaffii pillugit Europami Isumaqatigiissut
Naalakkersuisut atsiortuusut, Europarådimi ilaasortaasut; eqqarsaatigalugu Naalagaaffiit Peqatigiit ulloq 10 december 1948-imi ataatsimeersuarneranni inuit pisinnaatitaaffii pillugit nunarsuarmut nalunaarutaannik nalunaaruteqarmata; eqqarsaatigalugu nalunaarutip taassuma siunniummagu tassani pisinnaatitaaffiit silarsuarmut tamarmut atuunnerisa kinguneqarluartumillu akuerineqarnerisa eqqortinneqarnissaannillu qulakkeerinissaq; eqqarsaatigalugu Europarådip siunertaa tassaasoq ilaasortami akornanni qaninnerusumik peqatigiinnermik pilersitsinissaq, siunertallu taassuma anguneqarnissaanut periarfissat ilaat tassaalluni inuit pisinnaatitaaffiinik tunngaviusumillu kiffaanngissuseqarnermi pisinnaatitaaffiit atatiinnarnissaat sulilu annertunerusumik tapersersorneqarnissaat; tassa nunarsuarmi naapertuilluartumut eqqissisimanissamullu tunngaviusuusut kiffaanngissuseqarnissamut pisinnaatitaaffiit tunngaviusut taakku itisuumik upperineqarmata, pitsaanerpaamillu illuani inuit tamat oqartussaaqataalluni naalakkersuisoqarnerup piviusup atortinneqarnera aappaatigullu nassuerutigalugulu inuit pisinnaatitaaffiinik peqatigiilluni paasinnillutik peqatigiilluni ataqqinnillutik; tassa europami naalagaaffinni naalakkersuisutut anersaarlu ataaseq anersaaqarfigalugu aamma politikkikkut ileqqunik, anguniakkanillu peqatigiillutik kingornussaqarlutik, kiffaanngissusermut inatsisillu namminersortuunerinut ataqqinnillutik aalajangersimapput nunarsuarmiut nalunaarutaanni eqqartorneqartunik pisinnaatitaaffiit ilaannik ataatsimoorlutik atortitsinissap qulakkeerneqarnissaanut alloriarnerit siulliit tigusimallugit, uku pillugit isumaqatigiipput:
Immikkoortortaq 1
Inuit pisinnaatitaaffiinik ataqqinninnissamut pisinnaatitaaffik Illuatungeriit isumaqatigiissuteqartut ataqqinartut oqartussaaffimmi inuk kinaluunniit Isumaqatigiissummi tassani immikkoortoq 1-imi allanneqartunik pisinnaatitaaffinnik kiffaanngissuseqarnernillu neriorsorneqartut.
Immikkoortortaq 2 - Inuunermut pisinnaatitaaneq
- Inuup kialluunniit inuunermut pisinnaatitaanera inatsisikkut illersugaavoq. Kinalunniit piaaraluni toqunneqassanngilaq, toqumut eqqartuussaanerup naammassineqarnera eqqaassanngikkaanni, pinerluttuliornermut pineqartumut toqumut pillaasarnermik inatsisikkut aalajangersaasoqarsimatillugu eqqartuussivimmit nalunaarutigineqarpat.
- Toqunneqarneq Immikkoortortamut matumunnga akerliusumik pisimasutut isigineqassanngilaq, pisariaqavissoq sinnerlugu pissaanermik atuinerup taanna malitsigippagu:
- a) inatsisinut akerliusumik ajoquserneqarnermut arlaannik illersuiniarluni;
- b) inatsisit naapertorlugit tigusarinninniarnermi imaluunniit inatsisit naapertorlugit tigummineqarallarnermiit qimaaneq pinngitsoortinniarlugu;
- c) inatsisit tunngavigalugit eqqissiviilliortitsilluni perulluliornernit imaluunniit pikitsitsinernit arlaannik naqisimanninneq.
Inuit Pisinnaatitaaffii pillugit Europami Isumaqatigiissutaat tamakkerlugu uani atuaruk:
