Arnanik assigiinngisitsisarnerit suulluunniit atorunnaarsinniarlugit NP-t Isumaqatigiissutaat
Isumaqatigiissummi matumani oqaaseq »arnanut assigiinngisitsineq« isumaqarpoq, suiaassutsinut aalajangersimasunut tamanut immikkoortitsineq, ilaatitaannginneq imaluunniit killiliineq, tamatumani arnat qanorluunniit aappariinnermi inissisimagaluarunik angutit naligalugit politikikkut, aningaasaqarnikkut, isumaginninnikkut, piorsarsimassutsikkut, innuttaasutut allatigullu tunngaviusumik kiffaanngissuseqarnissamut pisinnaatitaaffinnik inuullu pisinnaatitaaffiinik tunngaviusumik iluaquteqarsinnaanerannik imaluunniit suliaqarsinnaanerannik annikillisitsinermik sunniuteqarpat atorunnaarsitsinermilluunniit siunertaqarpat.
Naalagaaffiit peqataatitaqartut arnanut assigiinngisitsinerit qanorluunniit ittut tamaasa assuaraat, isumaqatigiipput arnanut assigiinngisitsinerup atorunnaarsinneqarnissaanut atortussat naleqquttut tamaasa atorlugit nakimanatillu politikimik ingerlatsiniarlutik, tamannalu siunertaralugu suliariniarpaat
- angutit arnallu akornanni naligiissitaanermut tunngaviusoq nunaminni naalakkersuinikkut aaqqissugaanermut imaluunniit inatsisiliornermut naleqquttumut allamut ilanngutissallugu, tamanna pereersimanngippat, inatsisiliornerlu imaluunniit iliuusissaq naleqquttoq alla aqqutigalugu tunngaviusup taassuma ajornaatsumik naammassineqarnissaa qulakkiissallugu;
- naleqquttumik inatsisiliorneq piareersaatissallu allat naammassiniarlugit, taakkununnga ilanngullugit pineqaatissiissutissatut aalajangersakkat pisariaqartinneqartut arnanut assigiinngisitsinissamut inerteqqutaasut;
- angutit naligalugit arnat pisinnaatitaaffiisa eqqartuussisutigoortumik illersorneqarnissaat aqqutissarsiuutissallugu, nunamilu eqqartuussiviit pisortallu suliffeqarfii allat oqartussaassusillit aqqutigalugit immikkoortitsinernut sunulluunniit arnat sunniuteqarluartumik illersorneqarnissaat qulakkiissallugu;
- iliuutsini imaluunniit suliani arlaanni arnanut immikkoortitsisuni peqataanissamut naaggaassallutik, pisussaaffillu taanna naapertorlugu pisortatigut oqartussaasut suliffeqarfiillu iliuuseqartarnissaat qulakkiissallugu;
- inuup kialluunniit, kattuffiit imaluunniit suliffeqarfiit tungaanit arnanut immikkoortitsinerit atorunnaarsinnissaannut naleqquttumik iliuusissat tamaasa suliarissallugit;
- suliniutissat naleqquttut tamaasa isumagissallugit, tassunga inatsisit, aalajangersakkat, ileqqut suleriaatsillu atuuttut arnanut immikkoortitsinermik nassataqartartut allanngortinneqarnissaannut imaluunniit atorunnaarsinneqarnissaannut inatsisiliorneq ilanngullugu;
- nunani pillaanissamut aalajangersakkat arnanut immikkoortitsinermik imallit tamaasa atorunnaarsinniarlugit.
Arnanik assigiinngisitsisarnerit suulluunniit atorunnaarsinniarlugit NP-t Isumaqatigiissutaat tamaat uani atuaruk:
