Ammip qalipaataa tunngavigalugu assigiinngisitsisarnerit tamarmik atorunnaarsinneqarnissaannik NP-t Isumaqatigiissutaat
Isumaqatigiissummi tassani taaguut »ammip qalipaataanik assigiinngisitsineq« isumaqarpoq naligiimmik akuerineqarnerup, iluarusunneq imaluunniit inuit pisinnaatitaaffiinik ingerlataqarnerup aamma politikkikkut, aningaasarsiornikkut, inuuniarnikkut, kulturikkut imaluunniit inuiaqatigiinni sumiluunniit allami tunngaviusumik kiffaannngissuseqarnikkut pisinnaatitaaffiit atorunnaarsinnissaat imaluunniit sanngiillisinneqarnissaat siunertaalluni imaluunniit sunniutaalluni ammip qalipaataa, naggueqarneq imaluunniit inuiaassuseq imaluunniit inuiannik aallaaveqarneq tunngavigalugu assigiinngisitsineq, ilaatitsinnginneq, killilersuineq imaluunniit salliutitsineq sunaluunniit.
Isumaqatigiissummi tassani naalagaaffiup peqataasup nammineq naalagaaffimmi innuttaasumi nunallu allamiut akornanni iliuuserisaannut taamatut assigiinngisitsinernut, ilaatitsinnginnernut, killilersuinernut imaluunniit salliutitsinernut isumaqatigiissut una atorneqanngilaq.
Isumaqatigiissummi matumani sunaluunniit imatut nassuiarneqassanngilaq taanna naalagaaffiup peqataasup inuiaassuseq, naalagaaffimmi innuttaaneq imaluunniit naalagaaffimmut innuttanngortitsinermut tunngasuni inatsisaanut arlaannaatigulluunniit attuumassuteqartoq, inatsit taanna inuiaassutsinut aalajangersimasunut assigiinngisitsinngippat.
Inuit taakku imaluunniit inuit ataasiakkaat inuit pisinnaatitaaffiinik tunngaviusumillu pisinnaatitaaffinnik iluaquteqarnissamik imaluunniit ingerlatsinissamik naligiimmik pisinnaatitaaffeqarnerisa qulakkeerneqarnissaanut pisariaqartitsisinnaasut ammip qalipaataatigut imaluunniit inuianni immikkoortut imaluunniit inuit ataasiakkaat aalajangersimasut naammaginartumik siuariarnissaannik taamaallaat siunertaqartut immikkut aaqqiinerit ammip qalipaataanik assigiinngisitsinertut isigineqassanngillat, taakku aaqqiinerit ammip qalipaataannut assigiinngitsunut immikkut pisinnaatitaaffinnik allanngortitsinnginnissamut kinguneqanngippata aamma taakku siunertaasa naammassineqarnissaasa tungaannut taamaallaat attanneqarpata.
Naalagaaffiit peqataasut ammip qalipaataanik assigiinngisitsineq assuaraat, ammip qalipaataanik assigiinngisitsinerit qanorluunniit ittut atorunnaarsinneqarnissaannik siuarsaasunik aamma taakku akornanni paasinninnermik siuarsaasumik siunertaqartumik sakkut tulluartut tamaasa atorlugit kinguarsarneqanngitsumillu politikkeqarnissamut pisussaaffeqarlutik, naalagaaffiillu peqataasut tamarmik:
- taamaattumik pisussaaffilerlutik inunnut, inunnut eqimattanut imaluunniit suliniarfinnut ammip qalipaatigut assigiinngisitsinermut akuliullutik arlaannaatigulluunniit iliuuseqanngisaannassallutik aamma pisussaaffik taanna naapertorlugu naalagaaffimmi kommuninilu oqartussat suliniarfiillu iliuuseqarnissaasa qulakkeernissaanut;
- taamaattumik inuit ataasiakkaat imaluunniit suliniaqatigiiffiit tungaanniit ammip qalipaataanik assigiinngisitsinernut suliniuteqannginnissamut, illersuinnginnissamut imaluunniit tapersersuinnginnissamut pisussaaffilerlutik ;
- taamaattumik naalagaaffimmi kommuninilu oqartussat politikkiinik isornartumik misissuinissamut kinguneqarluartunik aaqqiinernik aalajangiissallutik aamma ammip qalipaataanik assigiinngisitsinerit pilersinnerinik imaluunniit attatiinnarnerinik kinguneqartut inatsisit aalajangersakkallu tamaasa allanngortissallugit imaluunniit atorunnaarsissallugit,
- taamaattumik sakkut tulluartut tamaasa atorlugit, tassunga ilanngullugu taamatut inatsisit pissutsit pisariaqartippassuk, inummit ataatsimit, eqimattanit imaluunniit suliniaqatigiiffimmit ingerlanneqartoq ammip qalipaataanik assigiinngisitsineq inerteqqutigissallugu unitsissallugulu,
- taamaattumik pisussaaffigalugu suliniaqatigiiffiit ingerlatseqatigiillu ammit qalipaataannik arlalinnit peqataaffigineqartut aamma ammip qalipaataanik assigiinngisitsinermik atorunnaarsitsinissamik suliaqartut tulluartumik kaammattussallugit ammit qalipaatit akornanni killiliinerit peerneqarnissaannut sakkut allat siuarsarneqassasut aamma ammit qalipaataannik immikkoortitsinerit nukittorsarnissaannik siunertaqartut tamaasa akioqqullugit.
Ammip qalipaataa tunngavigalugu assigiinngisitsisarnerit tamarmik atorunnaarsinneqarnissaannik NP-t Isumaqatigiissutaat tamaat uani aajuk:
