Suleriusissaq

Download PDF

Suleriusissaq uani aaguk

Aallaqqaasiut

Inuit Pisinnaatitaaffiinut Kalaallit Nunaata Siunnersuisoqatigiivi pillugit Inatsisartut inatsisaanni nr. 20, 27. november 2018-imeersumi (Inatsit) § 7, imm. 2 naapertorlugu Inuit Pisinnaatitaaffii pillugit (Kalaallit Nunaata) Siunnersuisoqatigiivisa (Siunnersuisoqatigiit) suleriaasissaannut killissarititaasut matumani suleriaasissami aalajangersarneqarput.

Kapitali 1

Siunertarineqartut, suliassaat taaguutaalu

§ 1. Inuit Pisinnaatitaa pillugit (Kalaallit Nunaata) Siunnersuisoqatigiivi arlaannaannulluunniit attuumassuteqanngillat inuillu pisinnaatitaaffii pillugit ataatsimut isigalugu ilisimasanik piginnaasanillu annertusaanermut suleqataanissaat siunertarineqarpoq, tak. Inatsimmi § 1. Inuit Pisinnaatitaaffiinut Kalaallit Nunaata Siunnersuisoqatigiivisa suliassaraat inuit pisinnaatitaaffiisa siuarsarneqarnissaat illersorneqarnissaallu, tak. suliassat Inatsimmi § 2-mi allassimasut.
Imm. 2. Siunnersuisoqatigiit naammagittaalliuutinik ataasiakkaanik suliaqarneq ajorput.

§ 2. Siunnersuisoqatigiit Inatsit naapertorlugu Inuit Pisinnaatitaaffiinut Kalaallit Nunaata Siunnersuisoqatigiivinik taaguuteqarput.
Imm. 2. Siunnersuisoqatigiit taaguutaat uku avammut saqqummernermi sapinngisamik atorneqassapput: Inuit Pisinnaatitaaffiinut Kalaallit Nunaata Siunnersuisoqatigiivi imaluunniit Inuit Pisinnaatitaaffii pillugit Isumalioqatigiissitaq.

§ 3. Siunnersuisoqatigiit naapertuilluarlutik ilisimasatillu tunngavigalugit sulisarnissaasa qulakkeernissaa siunertaralugu suleriaaseq una atuuppoq, aamma Siunnersuisoqatigiinni akerleriittoqaraluarpalluunniit.
Imm. 2. Suleriaaseq una Siunnersuisoqatigiinni ilaasortanngorlaat Siunnersuisoqatigiit suleriaasiannik paasinnilluarnissaannut iluaqutaaqataassaaq.

Kapitali 2

Aaqqissuussaaneq, pisussaaffeqarneq aalajangiisinnaatitaanerlu

§ 4. Siunnersuisoqatigiinni siulittaasoq taasisinnasunit nalinginnaasumik amerlanerussuteqartunit taaneqarnermigut ukiunut marlunnut toqqarneqartassaaq, tak. Inatsimmi §7, imm.1. Siunnersuisoqatigiit siulittaasup qinigaaffiani siulittaasup tullianik aamma taasisinnaapput. Siulittaasoq siulittaasullu tullia ilaasortanit Inatsisartunit toqqakkanit taamaallaat toqqarneqarsinnaapput.
Imm. 2. Siunnersuisoqatigiit siulittaasuata Siunnersuisoqatigiit sulinerat aqussavaa Siunnersuisoqatigiinnillu avammut sinniisuussalluni. Ileqqussarititaasut tamarmik inatsisinik malitseqartut kiisalu suleriaatsip matuma malinneqarnissaa siulittaasup nakkutigissavai.
Imm. 3. Siunnersuisoqatigiit siulittaasup tullianik taasisimappata taassuma siulittaasoq ikiortassavaa. Siulittaasup peqataasinnaannginnerani siulittaasup tulliata siulittaasoq sinnerlugu Siunnersoqatigiinni siulittaasutut paarlattaassaaq avammullu sinniisuussalluni.
Imm. 4. Siunnersuisoqatigiit ilaasortaasa 13-iusut ikinnerpaamik ilaasortat arfineq-marluk siulittaasup qinigaaffiata naannginnerani peersinneqarnissaanik kissaateqarunik tamanna pillugu siunnersuisoqatigiit ataatsimiinnissaannik pilersaarutigineqartumut siullermut oqaluuserisassanut ilanngunneqarnissaa piumasarisinnaavaat, imaluunniit siunnersuisoqatigiit immikkut ittumik ataatsimiinnissaat piumasarisinnaavaat, tamanna pillugu oqaluuserisassanut ilanngussinermikkut.
Siunnersuisoqatigiit ilaasortaasa taasisinnaasut 2/3-liisa amerlanerussuteqarlutik siulittaasoq peersissinnaavaat, Inatsimmi § 7, imm. 1 takuuk. § 18, imm. 2 naapertorlugu allakkatigut taasisoqassaaq.

§ 5. Siunnersuisoqatigiit ulluinnarni aqutsisunik (UA) taasissapput.
Imm. 2. Uku UA-mi ilaasortaatinneqassapput: Siulittaasoq Siunnersuisoqatigiinnilu ilaasortat allat marluk, taakkunani aappaa tassaassalluni siulittaasup tullia, taassuminnga taasisoqarsimappat, tak. § 3, imm. 1.
Imm. 3. Ulluinnarni aqutsisut peqannginnerani taarsiisussaq ad hoc-mik taaneqartassaaq.
Imm. 4. UA-p Siunnersuisoqatigiinni ulluinnarni aqutsinermut qulakkeerisuunissi suliassaraa. UA Allattoqarfik suleqatigalugu Siunnersuisoqatigiit iliuusissatut pilersaarusiatut aalajangersagaat naapertorlugu tigussaasumik iliuuseqartassaaq, kiisalu tapiissutit annertussusaat naapertorlugit tulleriiaaralutik suliniuteqartassaaq.

§ 6. Siunnersuisoqatigiit taakkua sinnerlugit allaffitsigut aqutsisoqarfiusumik taakkununngalu kiffartuussiviusumik namminneq allattoqarfeqarput, tak. Inatsimmi § 8.
Imm. 2. Siunnersuisoqatigiit namminneq allaffimmik aqutsisussamik allanillu sulilertitsillutillu suliunnaarsitsisassapput.
Imm. 3. Studentermedhjælperimik, kajummissutsimik sulisumik, suliffimmillu misiliisumik atorfinitsitsisoqarniartillugu Siunnersuisoqatigiit atornitsitsisartussanik suleqatigiissitaliussapput.
Imm. 4. Siunnersuisoqatigiit allaffimmi aqutsisup suliassaasa allattorsimaffiat ersarissumik suliakkiinertalik akisussaaffillillu suliarissavaat.

§ 7. Siunnersuisoqatigiit akiliinernut nalinginnaasumik ingerlatsinermut attuumassutilinnut tamanut aalajangiisassapput.
Imm. 2. Siunnersuisoqatigiinni ilaasortat arlaannaalluunniit Siunnersuisoqatigiit akiligassaannik nammineq akiliinissaminut pisussaaffeqanngilaq.

§ 8. Siunnersuisoqatigiinniit avammut nalunaaruteqarlutik siulittaasoq ilaasortarlu ataaseq atsiortassapput.
Imm. 2. Aningaaseriviup nittartagaatigut akiliinerit ukunanit taamaallaat isumagineqaqqusaapput; siulittaasoq, siulittaasup tullia allattoqarfimmilu pisortaq.
Imm. 3. Siulittaaq aamma/imaluunniit allattoqarfimmi pisortaq kortimik akiliummik tunineqarsinnaapput. Korti akiliut tunniussaq nalinginnaasumik ingerlatsinermut akiliinernut taamaallaat atorneqaqqusaavoq. 10.000 koruunit sinnerlugit nalilinnik akiliinerit inummit allamit aamma uppernarsarneqassapput, tak. imm. 3.
Taamaallaat Siunnersuisoqatigiit aningaasanik atornermut aammalu pigisanik nalilinnik pisinermut, tunisinermut qularnaveeqqusiussinermulluunniit tunngatillugu aalajangiisuusassapput.

Kapitali 3

Aningaasaqarneq

§ 9. Nunatta Karsianit tapiissutit Inatsimmi § 9, imm. 2-mi taamaallaat allassimasut malillugit atorneqassapput.

§ 10. Inatsimmi § 11 naapertorlugu Siunnersuisoqatigiit Naalakkersuisunut ukiumi naatsorsuiffiusumi missingersuusiornermut siunnersuutinik ukiut tamaasa kingusinnerpaamik apriilip ulluisa 15-ianni saqqummiisassapput. Siunnersuutit saqqummiussaat isertitassat aningaasartuutissallu missingersuusiornerannik, kiisalu Nunatta Karsiata ukiumi naatsorsuusiorfiusumut taaneqareersumut tapiissutigineqartussat annertussusissaat pillugit siunnersuutinik, ilaqassapput.
Imm. 2. Allattoqarfik missingersuutit malitseqartinnerat pillugu ataatsimiinnerit tamaasa saqqummiisassaaq.

§ 11. Inatsimmi § 12, imm. 1 naapertorlugu ukiumi naatsorsuusiorfiusumi ukiumut naatsorsuusiortoqartassaaq.
Imm. 2. Allattoqarfik Siunnersuisoqatigiit sinnerlugit naatsorsuusiortassaaq.
Imm. 3. Allattoqarfik kukkunersiuisumik naatsorsuusioqataasussamik ikiortiserinnissinnaavoq.

§ 12. Ukiumut naatsorsuusiat Nunatta Karsiata ukiumut naatsorsuusiaanik kukkunersiuisumit kukkunersiorneqassapput, tak. Inatsimmi § 12, imm. 2.
Imm. 2. Allattoqarfiup ukiumut naatsorsuutit ilanngussartallit Naalakkersuisoqarfimmut akisussaasuusumut ukiortaap kingorna sapinngisamik piaarnerpaamik nassiutissavai. Naalakkersuisoqarfiup ukiumut naatsorsuutit kukkunersiuisumut nassiutissavai.
Imm. 3. Inatsimmi § 12, imm. 3 naapertorlugu Siunnersuisoqatigiit naatsorsuutit kukkunersiorneqareerneranniit sap. akunneri sisamat qaangiutsinnagit nittartakkaminnut tamanut saqqummiutissavaat.

Kapitali 4

Ataatsimiinnerit

§ 13. Inatsimmi §7, imm. 3 naapertorlugu ikinnerpaamik ukiumut marloriarluni ataatsimiittoqartassaaq. Siunnersuisoqatigiit ataatsimiiffissaat pilersaarusiorneqassapput, allattoqarfillu ataatsimiinnissaq sap. akunneri 6-inik sioqqutsilluni ataatsimiigiaqqusisassaaq.
Imm. 2. Immikkut illuinnartumik aatsaat pisoqartillugu ataatsimiinnerit Nuup avataani pisarsinnaapput.
Imm. 3. UA-p aalajangersinnaavaa, ilaasortat ilai Siunnersuisoqatigiit ataatsimiinneranni oqarasuaatikkut isiginnaarutikkulluunniit peqataassasut.
Imm. 4. Ataatsimiinnermi kalaallisut danskisullu oqaatsit atorneqassapput.
Imm. 5. Ataatsimiinnermi tullermi oqaluuserisassat allattoqarfiup ataatsimiinnissaq
kingusinnerpaamik ullunik 14-inik sioqqullugu nassiutissavai, ullormullu oqaluuserisassat minnerpaamik makku imarissavai:

  1. Oqaluuserisassat akuerineqarnerat
  2. Siunnersuisoqatigiit kingullermik ataatsimiinnerannit imaqarniliap akuerineqarnera
  3. Siunnersuisoqatigiit suliaasa killiffiat
  4. Allattoqarfimmi pisortap missingersuutit malitseqartinneqarnerannik saqqummiussai
  5. Taasariaqartut allat

Imm. 6. Oqaluuserisassatut siunnersuutit ataatsimiinnissaq kingusinnerpaamik sap. akunneri sisamat sioqqullugu allattoqarfimmut nassiunneqassapput, tamatuma kingorna UA-p allattoqarfik suleqatigalugu oqaluuserisassat pillugit siunnersuusiussaaq.
Imm. 7. Ataatsimiinnerit imaqarniliassaannut missingiummik allattoqarfik suliaqartassaaq, siulittaasorlu isumaqatigiissuteqarfigalugu missingiut siunnersuisoqatigiinni ilaasortanut tamanut nassiuttassavaa.

§ 14. Siunnersuisoqatigiit ataatsimiinnerit tamanut ammasuunissaanik aalajangiisinnaapput, tak. Inatsimmi §5, imm. 3.

§ 15. Siunnersuisoqatigiit ukiumi ataatsimiinnermi siullermi ukiumoortumik pilersaarusiaq ukiumi pineqartumi suliassaat siunnersuisoqatigiit aalajangersartassavaat.
Imm. 2. Ukiumoortumik pilersaarutissamut missingiut Siunnersuisoqatigiinni ilaasortanit inassuteqaatit aallaavigalugit siulittaasumit suliarineqartassaaq, ullormullu oqaluuserisassanut ilutigitillugu nassiunneqartassalluni.
Imm. 3. Ukiumoortumik pilersaarutip iluaniippoq Siunnersuisoqatigiit suliassatut aalajangiussaannik naammassinninnissamut suleqatigiissitatut pilersinneqarsimasinnaasunut inassuteqaatit.
Imm. 4. Siunnersuisoqatigiit ataatsimiinnerisa naammassineranni suliniutissanik nutaanik aallartitsinissamut aalajangiisinnaapput, tamatumani suleqatigiissitanik pilersitsinnaaneq ilanngullugu.

§ 16. Attaveqaqatigiinnerit, ataatsimiigiaqqusinerit, ullormut oqaluuserisassanik nassiussinerit il.il. qarasaasiatigut pisarput. Siunnersuisoqatigiinni ilaasortat pisussaapput, sukkulluunniit mailadresseminnik qaqugukkulluunniit atuuttunik allattoqarfimmut nalunaaruteqarnissamik.

§ 17. Siunnersuisoqatigiit ataatsimiinnissaanni peqataasinnaanngikkaanni allattoqarfimmut nalunaarutigineqassaaq.

§ 18. Siunnersuisoqatigiit aalajangingaat naapertuuttumik aallaaveqartumik tunngavilerneqartassapput.
Imm. 2. Siunnersuisoqatigiit suleriaasertik malillugu taasinikkut aalajangiisussaatillugit ilaasortap taasisinnaatitaasup ataatsip kinaassutsimik isertuussilluni taasisoqarnissaa piumasarisinnaavaa.
Imm. 3. Siunnersuisoqatigiit siulittaasussamik, siulittaasup tullissaanik kiisalu Institut for Menneskerettigheder (IMR) siulersuisunut ilaasortassamik qinersissapput.
Imm. 4. Qinersinermi aalajangiineq amerlanerussuteqarnikkut pissaaq.

§ 19. Siunnersuisoqatigiit aalajangiisinnaassuseqartarput ilaasortat taasisinnaatitaasut affaat sinnerlugit ataatsimeeqataappata, tassani ataatsimiigiaqqusinermi il.il. malittarisassat malinneqarsimagaangata.

§ 20. Inatsimmi § 7, imm. 4 naapertorlugu Siunnersuisoqatigiit ataatsimiittarnerisa saniasigut soqutigisaqaqatigiit ikinnerpaamik ukiumut ataasiarluni ataatsimeeqatigineqartassapput.
Imm. 2. Inuit pisinnaatitaaffii pillugit soqutigisaqaqatigiinnik oqaloqateqartarnissaq qulakkeerumallugu ataatsimeeqatigineqartassapput. Ataatsimeeqatigineri Siunnersuisoqatigiit aallussaannik suliniutaannillu ineriartortitsinermut iluaqutaassapput. Siunnersuisoqatigiillu inuit pisinnaatitaaffii pillugit iliuusissatut pilersaarusiornerannut aamma iluaqutaassapput.
Imm. 3. Ataatsimiinnermi peqataasut Kalaallit Nunaanni inuit pisinnaatitaaffiinut pingaarutilinnik saqqummiisarnissaat qulakkeerumallugu susassareqatigiinnissaat Siunnersuisoqatigiinnit qulakkeerneqassaaq.
Imm. 4. Soqutigisaqaqatigiinnik tusagassiuutit naleqquttut aqqutigalugit ataatsimiigiaqqusinerit ataatsimiinnissat sap. akunnerit marluk sioqqullugit pisassapput.

Kapitali 5

Tamanut ammasuuneq

§ 21. Siunnersuisoqatigiit suliaat sapinngisamik inuiaqatigiinnut ammasuutinneqassapput.
Imm. 2. Pisortat ingerlatsineranni suliassat suliarineqartarnerat pillugu Inatsisartut inatsisaanni nr. 8, 13. juni 1994-imeersumi allanut tusarliusseqqusinnginneq pillugu kapitali 8 naapertorlugu paasissutissat allanut tusarliuteqqusaanngitsut siulittaasup nalilerpagu, siunnersuisoqatigiinni ilaasortat ilaasortaanerminni paasissutissanik ilisimasaqalernertik eqqarsaatigalugu nipangiussimasussaatitaapput.

§ 22. Ukiumi ataatsimiinnermi siullermi ukiup siuliani Siunnersuisoqatigiit suliarisimasaat pillugit ukiumoortumik nalunaarusiassamut missingiut siulittaasup saqqummiutissavaa. Ukiumoortumik nalunaarusiaq Siunnersuisoqatigiinnit akuerineqarpat, nalunaarusiaq tamanut ilisimatitsissutigineqassaaq, tak. Inatsimmi § 13.

Kapitali 6

Ilaasortat pisussaaffii, suliami peqataasinnaannginneq ilaasortaajunnaarnerlu

§ 23. Siunnersuisoqatigiinni ilaasortaaneq akissarsiaqaataanngilaq, kajumissutsimillu suleqataanermik tunngaveqassalluni.

§ 24. Siunnersuisoqatigiinni ilaasortat Siunnersuisoqatigiit sulineranni taakkualu anguniagaasa angunissaannut eqeersimaartumik suleqataassapput, tak. § 1.
Imm. 2. Ilaasortap Allattoqarfik Siunnersuisoqatigiit sulinerannik aallussaannillu pilersaarusioqatigilluassavaa.
Imm. 3. Ilaasortaq immikkut piginnaasaqarfini aallaavigalugu ilisimasani tunngavigalugit suleqataassaaq.
Imm. 4. Ilaasortaq Siunnersuisoqatigiit suliaannut akerleriittunik allanik suliaqarpat Siunnersuisoqatigiinnit ilaasortaajunnaartariaqarpoq.
Imm. 5. Siunnersuisoqatigiinni ilaasortat inuit pisinnaatitaaffii pillugit suliaqarnermuti piumasaqaatit naapertorlugit sutigut tamatigut pimoorussillutik sulissapput.

§ 25. Siunnersuisoqatigiinni taasisinnaatitaasutut ilaasortap suliassaq pineqartumit peqataaffigineqarsinnaanera pillugu qularnartoqarpat, taava suliap suliaralugu aallartinneqannginnerani pineqartup siunnersuisoqatigiit nalunaarfigissavai.
Imm. 2. Suliami peqataasinnaannginneq pillugu apeqqut Siunnersuisoqatigiit taasinikkut aalajangiiffigissavaat.
Imm. 3. Suliami peqataasinnaannginneq pillugu apeqqut oqaluuserineqarsimappat siunnersuisoqatigiit aalajangiinerat imaqarniliami takuneqarsinnaassaaq.
Imm. 4. Ilaasortaq allaluunniit suliami peqataasinnaanngitsutut oqaatigineqartoq suliamut atatillugu oqallinnermut peqataassanngilaq, suliallu suliarineqarnerani ataatsimiiffik qimassallugu.

§ 26. Inatsimmi § 3, imm. 3 naapertorlugu Siunnersuisoqatigiinni ilaasortaatitaasuni quliusuni arlaat toqqagaaffigisani suli qaangiutinngitsoq Siunnersuisoqatigiinni ilaasortaajunnaarnissi kissaatigippagu tamanna Siulittaasumut nalunaarutigissavaa.
Imm. 2. Ilaasortaajunnaarusulluni nalunaartup ilaasortaajunnaarnera Allattoqarfiup Inatsisartut Allattoqarfiannut nalunaarutigissavaa.
Imm. 3. Inatsimmi § 4, imm. 3 naapertorlugu Inatsisartut ilaasortaajunnaartup toqqagaaffiata qaangiunnissaata tungaanut ilaasortaasussamik ilaasortanngortussatut innersuussat ilaannik toqqaassapput, tak. Inatsimmi § 6.

Kapitali 7

Atuutilerfia allannguutillu

§ 27. Suleriaaseq una Siunnersuisoqatigiit 2020-mi februaarip ulluisa qulingiluaanni siullerpaamik ileqquusumik ataatsimiinneranni atuutilerpoq.
Imm. 2. Suleriaatsimik allannguinissat 2/3-mik amerlanerussuteqarnikkut aalajangiunneqarsinnaapput, taakkualu Siunnersuisoqatigiit allannguutinik akuersiffiusumik ataatsimiinneranni atuutilissapput.

§ 28. Suleriaatsip matuma imaa Siunnersuisoqatigiinni ilaasortaanngitsut Siunnersuisoqatigiit suliaannik suleriaasiannillu paasisaqarluaqqullugit suleriaaseq una Siunnersuisoqatigiit nittartagaanni tamanut saqqummiunneqarsimassaaq.

Siunnersuisoqatigiit tamarmiullutik suleriaaseq una 2020-mi februaarip ulluisa qulingiluaanni akuersissutigivaat

Sara Olsvig, siulittaasoq

Anders Meilvang, siulittaasup tullia

Nike Berthelsen, Ulluinnarni Aqutsisuni ilaasortaq

Arnajaaq Lynge, ilaasortaq

Henrik Sandgreen, ilaasortaq

Lise Mørup Dalgaard, ilaasortaq

Sofie Lennert, ilaasortaq

Annemette Nyborg Lauridsen, ilaasortaq

Ludvig Larsen, ilaasortaq

Hans Reimer, ilaasortaq

Aviâja Egede Lynge, ilaasortaq aalajangersimasoq

Christina Johnsen, ilaasortaq aalajangersimasoq

Kathrine Bødker, ilaasortaq aalajangersimasoq